Bay-am nga Agbiagak iti Sidong Ni Arapaap

Bay-am a lugobannak ni saem
Iti saklot mangliwengliweng a sipnget
Bay-am nga agaribasay dagiti lua
Tapno yanudna dagiti riper ni sanaang
Bay-am a sangitak agtabon a malem
Ket igalutnak ti batibat a darepdep
Bay-am lugobannak ni kinaranggas
Iti panangilugesmo sinapataanta
Nga ayat…
Tammidawak ita ti burayok
Ta birokek ti aganninaw-makagapu
Iti intanemmo a sapatam
Iti tinubayta nga ayan-ayat
Bay-am nga ililinak ti alinuno
Tapno iyindayonnak ni tagilipat
Bay-am a matmatak ti narsaak a paraiso
Ti tinagibassitmo nga ayan-ayat
(Wenno inabalbalaymo?)