Footer

Baybay nagaluyo, 1,500 residente iti 3 coastal barangays ti Santa, apektado


SANTA, Ilocos Sur – Tallo gasut ket dua a pamilia a buklen ti 1,510 a residente ti tallo a barangay ditoy nga ili ti apektado ti storm surge a ginubuay ti Bagyo Carina idi Hunio 20.

Karaman kadagiti naapektaran ti 164 a pamilia (820 tattao) iti Barangay Pasungol; 70 a pamilia (350 tattao) manipud iti Barangay Tabucolan ken 68 a pamilia (340 tattao) iti Barangay Bucalag.

Mismo a pinasiar ni Mayor Jeremy Jesus Bueno III dagiti nadakamat a barangay tapno personal a bagaanna dagiti agindeg nga agpaingda pay laeng iti nataltalged a lugar agingga nga ages-es ti danum tapno maiyadayoda iti didigra.

Dagus met a nagkuti ti gobierno probinsial ti Ilocos Sur babaen ti Provincial Social Welfare and Development Office ket nagiwaras iti relief goods kadagiti naapektaran.

Segun ken ni PSWD Officer Ferdinand Concepcion, inisial pay laeng daytoy a bilang dagiti nabiktima gapu ta bayat a masursurat daytoy a damag, ti pay laeng Santa ti nakaited iti report iti opisinada.

Kabayatanna, insingasing ni Bokal Ronnie Rapanut ti pannakaideklara nga under state of calamity dagiti ili a naapektaran iti storm surge.

Iti babaen ti state of calamity, mabalinen nga aramaten ti lokal a gobierno dagitoy a lugar ti calamity fund a nailatang para iti kastoy a pagteng.

Iti report a dimmanon kadagiti lokal a radio stations, malaksid ti Santa, sumagmamano a coastal barangays ti Sta. Catalina, Narvacan, Caoayan, Cabugao ken Vigan City ti nalayus gapu iti panagdinakkel ti baybay.

Naireport a simmalpa ti danum iti seawall iti Sta. Catalina, Ilocos Sur ket linayusna dagiti puttot nga adda iti asideg.

Saan pay nga ammo ti pateg dagiti nadadael a pamupokan.

Mapattapatta nga aganay kagudua a milion ti pukaw dagiti agtartaraken iti lames iti sumagmamano a coastal barangays iti Vigan City gapu iti pannakalapunos dagiti pamupokanda.

Naireport nga aganay  P200,000.00 ti balor ti napukaw sadiay Mindoro, P119,000.00 iti Pantay Laud, P12,000 iti Pantay Daya, P40,000 iti Beddeng Laud, P34,000 iti Pantay Fatima ken P11,000 iti Bulala. (Karaman ti report ni Mancielito S. Tacadena)