Beach Sports Festival, naangay

BAUANG, La Union – Naangay ti Beach Sports Festival ditoy itay Abril 24-26 kas paset ti panangipromot dagiti agtuturay iti ili a maysa kadagiti kangrunaan a pagpallailangan dagiti turista iti Amianan.

Pattapatta dagiti agtuturay, agarup 3,000 a bisita ti nakipagrambak iti tallo aldaw a parambak nga addaan slogan, “Rediscover Bauang”.

Ad-adu dagiti aktibidad iti daytoy a tawen ngem iti napalabas a pakaibilangan ti inter-barangay mini olympics, family fun run, search for best tasting halo-halo and barbecue ken Zumba iti igid ti baybay.

Adda pay pasalip iti skim boarding ken sand sculpting, kite flying, bartending ken bikini contest.

Kinuna dagiti agtuturay ditoy nga idadauluan ni Mayor Eulogio Clarence de Guzman, babaen ti Beach Sports Festival, namnamaenda a mapasubli ti Bauang ti birngasna a “Beach Capital of the North”.#