BEI iti Caoayan, nakasaganan nga agpabutos

CAOAYAN, Ilocos Sur – Nakasaganan dagiti Board of Election Inspectors a mangimaton iti panagbubutos inton Mayo 13, daytoy ti naammuan manipud iti municipal election officer ditoy itay nabiit.

Kinuna ni Election Officer Nelson Pajaro nga awan ti problema mainaig iti annongen dagiti BEI iti masungad nga eleksion agsipud ta naaddaanda iti briefing  ken nagsanay dagitoy iti panag-operate iti PCOS machines idi Marso 26 ken 27.

Agdagup iti 57 dagiti BEI ditoy nga ili a mangisayangkat iti panagbubutos kadagiti 19  clustered precincts manipud kadagiti 17 a nadumaduma a barangay.

Awan ti nagtured a simmango ken ni incumbent Mayor Germie Singson-Goulart iti daytoy a panagpailayonna gapu kadagiti adu a nagapuananna iti umuna a terminona a pakairamanan ti pannakaipatakder iti baro a balay ti ili.#