Benepisario ti social pension program, narebisa

STO. DOMINGO, Ilocos Sur – Rinebisa ti opisina ti social and welfare development ditoy nga ili dagiti benepisario iti programa ti national government a Social Pension Program agsipud iti pannakaduktalda nga adda dagiti nairaman iti listaan a diskualipikado a benepisario iti nasao a programa.

Segun ken ni Fe Valencia, municipal social welfare and development officer, nga adda dagiti naduktalan ti opisinada a nairaman iti listaan dagiti benepisario iti babaen ti Social Pension Program a naggapu iti DSWD national office nga agpenpension metten.

Sabali pay ti naduktalan ti MSWD a nairaman a benepisario iti nasao a programa nga agtawenda laeng iti nakurang 40.

Nangrugi iti daytoy a tawen ti pannakaiyimplementar ti Social Pension Program a mabenepisiaran dagiti indigent a senior citizens nga agtawen iti 77 ken agpangato.

Umawat dagitoy a benepisario iti P500 iti binulan a monthly stipend tapno adda pangsupusopda iti magastosda iti inaldaw a pagbiagda ken para iti kasapulanda a medikal.

Naisayangkaten ti orientasion dagiti annuroten ken paglintegan ti nadakamat a programa kas intuding ti RA 9994 wenno ti Expanded Senior Citizens Act of 2010 kadagiti nadumaduma a social workers ken dadaulo ti Opisina ti Senior Citizens Affairs (OSCA) iti probinsia ti Ilocos Norte, Ilocos Sur, La Union ken Pangasinan.

Agdagup iti 54 dagiti senior citizens a nailista nga agpension iti P500 ditoy nga ili ngem segun ken ni Valencia, manamnama a dakdakkelto pay ti bilang dagiti mairaman a benepisario daytoy a programa.

Kabayatanna, agdagup iti 24 dagiti senior citizens ti nairekomenda nga agpension iti Caoayan, Ilocos Sur.

Kas maibatay iti rekord ti DSWD, agdagup iti 43 dagiti indigent a senior citizens nga agtawen iti 77 agpangato iti Caoayan ngem 8 ti natayen ken 11 ti nadiskualipika agsipud ta agpempensionda wenno adda annakda a mangsuporta kadakuada.

Intuding ti RA 9994 a saklawen ti Social Pension Program dagiti senior citizens a napanglaw (karaman ditoy dagiti saan nga agpenpension, awan pamiliada a mangsuporta kadakuada ken agbibiag iti baba ti kinapanglaw), dagiti nakapsut, masaksakit, disabled a nairaman iti masterlist ti DSWD National Household Targeting System for Poverty Reduction (NHTS-PR).

Naammuan nga iti Region I, adda kadagupan a 11,204 a potensial a benepisario  ti Social Pension Program a pakaibilangan ti 5,619 iti Pangasinan, 2,009 iti La Union, 2,116 iti Ilocos Sur, ken 1,460 iti Ilocos Norte.

Naipaannong iti City/Municipal SWDO ken pangulo ti OSCA ti pannala-validate ken pannakakumpirma dagiti agpension a nailista iti masterlist.#