Best implementor ti barangay intensive gardening, magunggonaan

VIGAN CITY – Magunggonaan dagiti municipal wenno city agriculture officers a mapili a best implementor iti barangay intensive gardening.

Segun ken ni Gov. Deogracias Victor Savellano, maikkan iti P20,000 a gunggona ti municipal wenno city agriculture officer a mapili a kasayaatan a mangiyimplementar iti barangay intensive gardening, P10,000 iti maikadua ken P5,000 iti maikatlo.

Uray dagiti barangay health nutrition scholars, maikkan met iti gunggona, kinuna ti gobernador.

Naiyussuat ti barangay intensive gardening kas pangsolbar iti kinakurapay ken malnutrision ditoy probinsia.#