Best performing LGUs, indibidual, pinadayawan ti RDC

Cabugao, Ilocos Sur – Inyalat ti Ilocos Norte ken ti Vigan City ti  pammadayaw a cleanest, greenest and safest province ken siudad iti rehion para iti napalabas a tawen.

Naiyawat dagiti pammigbig ken pammadayaw kadagiti nangabak iti programa a naangay idi Marso 24 iti Cabugao Beach Resort ditoy  kas panangbigbig ti Regional Development Councilt ti Region I nga idauluan kas chairman ni Gov. Deogracias Victor “DV’ Savellano.

Napadayawan met ti Cabugao a cleanest, greenest and safest town para kadagiti 1st-3rd class municipalities, ken ti Nueva Era, Ilocos Norte para iti 4th-5th class municipalities.

Kabayatanna, napadayawan a best inland body of water ti Tapuakan River ti Pugo, La Union, best coastal municipality ti Burgos, Ilocos Norte, best LGU based on LPGMS ti probinsia ti La Union, ti Naguilian, La Union para iti municipal category ken Candon City para iti city category.

Napadayawan met ti Agpiarkam Siglatmo Agsangsangkamaysakam Panagdur-asmo (ASAP)  Tagudin ti Tagudin, Ilocos Sur kas best practices idinto a best Coastal resource management implementor ti probinsia ti La Union ken Siudad ti Alaminos.

Napili met a most outstanding agency on project monitor ti Dept. of Social Welfare and Development (DSWD); best project implementor ti Philippine Port Authority (PPA) para iti proyekto a Currimao Port; most gender and development responsive agency for 2007 ti Bureau of Fisheries and Aquatic Resources (BFAR).

Para kadagiti adda iti pribado a sektor, napadayawan kas outstanding entrepreneur  ti Region I da Larimar Bautista ti Sancagulis Multipurpose Cooperative (Bayambang, Pangasinan) iti benneg ti manufacturing; Cynthia Dizon ti Family Trade House Corp. (Alaminos, Pangasinan) iti trading; Reynaldo Nisce ti Eso-Nisce Realty Development Inc. (San Fernando, La Union) para iti realty development ken Ret. Vice Adm. Alberto Marcelo ti Narra Multipurpose Cooperative (San Manuel, Pangasinan) para iti agriculture.

Automatiko a dagitoy ti mangibagi iti Rehion Uno para iti nationallevel ti kompetision.

Iti daytoy met la nga okasion, naiproklama a grandslam winner para iti C.Y. 2007 ti NEDA Region I idinto nga inyalat ni Dir. Leonardo Quitos ti Best Regional Director Award, ni Dir. Quitos ken Asst. Dir. Ernesto Datuin kas Best Management Tandem ken NEDA Region I kas Best Regional Office.

Inwaragawag ni Savellano ti pannakaangay ti dua nga aldaw nga strategic planning ti RDC iti maikadua a lawas ti Abril a maangay iti Fort Ilocandia, Laoag City. (Mancielito S. Tacadena/NBN Vigan)