Footer

Beterano iti gubat, sinelebraranda Araw ng Kagitingan

SANTIAGO, Ilocos Sur – Iti baet a bumasbassit ti bilangda gapu iti in-inut nga ipupusay dagiti kabaddungalanda, rinambakan latta dagiti beterano ditoy probinsia ti Araw ng Kagitingan sadiay Barangay Sabangan ditoy nga ili idi Abril 9.

Karaman dagiti timmabuno iti selebrasion dagiti beterano iti maikadua a gubat ti sangalubongan nga indauluan ni Ruben Magsi, district commander dagiti beterano iti Ilocos Sur, dagiti post commanders dagiti nadumaduma nga ili, ni Philippine Veterans Administration Officer Vicky Antiporda, ken ni Dr. Dedicacion Agatep-Reyes, asawa daydi naggobernador Dr. Godofredo S. Reyes a maysa a beterano ti gubat.

Kinuna ni Magsi a nupay bumasbassit ti bilangda a beterano ta adu kadakuadan ti di makapagna ken nakapsuten, itultuloyda latta a rambakan daytoy nga aldaw a panangipaneknek dagiti Filipino ti panagayatda iti pagilianda babaen ti pannakirupakda kadagiti ganggannaet a Hapon a nangsakup iti Filipinas idi maikadua a gubat ti sangalubongan.#