BFAR, imparitna panagkalap iti kapis

BANTAY, Ilocos Sur – Imbilin ti Bureau of Fisheries and Aquatic Resources ti pannakaiparit ti panagkalap iti kapis iti sumagmamano nga ili iti amianan a paset ti probinsia tapno malapdan ti agtultuloy nga ikikisangda.

Sagudayen ti pammilin nga imparuar ni BFAR Officer Benny Saraos a maiparit ti panagala ken panaglako iti kapis agsipud ta maibilang daytoy kadagiti endangered species a kasapulan a masalakniban tapno saanda a maungaw.

Itay nabiit, nagruar ti adu a lako a kapis a nakalap iti kabaybayan a sakup ti San Juan ken Sinait, Ilocos Sur.

Kinuna ni Saraos a kasapulan a masalakniban ti kapis agsipud ta kumiskisangen daytoy iti kabaybayan dagiti ili iti akin-amianan a paset ti  Ilocos Sur.

Kanaig daytoy, pinalagipan ni Saraos dagiti aglaklako a maikontra iti linteg ti panaglako kadagiti nabungbongan a lames.

Indagadag ni Saraos a kitaen dagiti makitkitienda dagiti lames a gatangenda amangan no naikkan dagitoy iti cyanide wenno pormalin.

Ar-aramaten dagiti sumagmamano a mananggundaway nga aglaklako dagitoy tapno agparang a presko dagiti lames a lakoda.

 Ti kapis ti kangrunaan a paggapgapuan dagiti kulintipay a maaramat a dekorasion dagiti bintana ken dibision dagiti kadaanan a pagtaengan kas kadagiti balay a bato iti siudad ti Vigan.#