BFP, nangiwayat inspeksion kadagiti dormitorio, pagadalan iti Vigan City

VIGAN CITY – Kas paset ti kampaniana a pannakaprotektar dagiti pasdek ken pagadalan, nangisayangkat ti Bureau of Fire Protction iti panagsukimat kadagitoy tapno masigurado nga awan ti panaglabsingda iti fire code ket malapdan ti uram iti siudad.

Kinuna ni Vigan City Fire Marshall Floro Obrero a nangiwayat pay ti BFP iti pre-fire planning no sadino a sinukimatda dagiti dadakkel a pasdek iti siudad tapno ammuenda no sadino ti kadarasan a sumrekan ti firetruck no adda uram, sadino ti kasayaatan a pagpuestuan dagitoy iti panangdepdepda iti apuy, ken pakasarakan ti kaasitgan a lugar a madagdagus a pagalaanda iti danum.

Innayonna a maysa pay a sinukimatda dagiti fire hydrants a pagsusopanda iti danum  kasta met a nakikoordinarda kadagiti otel nga addaan iti swimming pool tapno adda pangdarasanda a pagalaan iti danum a pagdepdepda.

Selselebraran ti BFP ti Fire Prevention Month tunggal Marso.#