BHWs, saan a maikkat gapu iti politika

VIGAN CITY – Indagadag ni Provincial Federated President Zenaida Pulido a saan koma nga ikkaten dagiti barangay officials dagiti BHWs nangruna dagiti di nangbutos kadakuada iti eleksion idi Oktubre agsipud ta nagtraining dagitoy ken akreditedda iti Department of Health ken rehistroda, saan laeng iti probinsial no di pay iti rehional ken nasional a pederasion.

Imballaag ni Pulido a saan a mabalin nga ikkaten dagiti barangay officials dagiti BHWs no politika ti makagapu agsipud ta addada iti proteksion ti RA 7883.

Kinuna ni Pulido a no masuktan ti maysa a BHW gapu iti politika, saan nga awaten ti pederasion ti kasukatna agsipud ta awan ti IDna, saan nga akredited ken saan a rehistrado ket makaammo dagiti barangay officials kadagiti benepisio dagiti naikkat nga aggapu iti probinsial ken nasional.

Kinuna ni Pulido nga adu ti trabaho ti BHWs ket nainayon pay daytoy 4 Ps ken paglintegan ti DoH a tunggal 20 nga agnaed iti barangay, masapul nga adda mai-assigned a maysa a barangay health worker.#