Footer

Biahe ti PAL a Manila-San Fernando City, marugian

San Fernando City, La Union – Inwaragawag ti Philippine Airlines nga addanton biahe ti eroplanoda manipud Manila-San Fernando City mangrugi inton Agosto.

Kinuna ti maysa nga opisial ti PAL a mamitlo iti makalawas ti biahe manipud Manila-San Fernando City ken vice versa  babaen ti Q300 ken Q400 aircrafts ti flag carrier ti pagilian a mangrugi inton Agosto.

Malaon ti Q300 ti 56 a pasahero idinto a 74 a pasahero ti malaon ti Q400. 

Manamnama a sakbay ti Agosto, malpas ti pannaka-upgrade ti airport ditoy siudad.

Maikalkalawa ti 1,320 meters a runway iti 3100 meters ken maikalawa ti aglawlaw ti airport tapno maakomodarna ti moderno a pasilidad ti maysa a kabaruanan nga airport, ken pakaipatakderan iti air navigations system ken support facilities  kas intuyang ti International Civil Aeronautics Organization.

Panggep ti Poro Point Management Corporation a pagbalinen daytoy nga international airport a mangakomodar iti Asia Pacific Region.

Kanaig itoy, manamnama ti yaay ni Presidente Gloria Macapagal Arroyo ditoy siudad inton Hunio 4 tapno inaguraranna ti 36 luxury suites ken 9-hole all weather golf course kas paset ti 65 nga ektaria a Mediteranean inspired resort a maipaspasdek iti Poro Point Freeport Zone.

Ti pannaka-develop ti Poro Point Freeport Zone ket paset ti super region a bision ti gobierno iti Amianan a Luzon.

Iti yaay ti PAL ditoy, manamnama ti dakkel a yaabante ti turismo ken negosio, saan laeng nga iti rehion Uno no di pay iti Cordillera. (Ma. Theresa B. Santos)