Footer

Biktima iti gubat iti Lebanon, agur-uray tulong pinansial

VIGAN CITY – Nagtignay ti provincial board tapno maited ti tulong a pinansial kadagiti overseas Filipino workers a biktima iti gubat ti Lebanon itay napalabas a tawen.

Kinuna ni Vice Gov. Jeremias “Jerry” Singson nga uray idi kampania ken kalpasan ti eleksion, mamitlo iti makadomingo a tumawtawag kenkuana dagiti OFWs a naggapu iti Lebanon mainaig iti tulong pinansial nga inkari ti gobierno probinsial nga ited kadakuada ket inkalbitna ken ni Bokal Chuchi Purisima, chairman iti committee on finance, iti panangidagadagda iti executive department tapno mangilatang iti pundo a maited a pinansial a tulong kadagiti biktima iti gubat iti Lebanon.

Kinuna ni Singson a naammuanda iti executive department nga insardengda ti nagited iti pinansial a tulong agsipud ta nagadu metten ti nagaplikar a naggapu iti Lebanon uray saanda met a biktima iti gubat.

Kinuna ti bise gobernador nga iti resolusion nga inaramid ti Sangguniang Panlalawigan, dagiti laeng victims of war ti maikkan iti pinansial a tulong ket mailaksid ditoy dagiti naggapu iti Lebanon sakbay wenno kalpasan ti gubat.

“Gayam diay resolusion nga immuna a naaramid (idi) saan nga specific,” kinuna ni Singson sana innayon a nangbuangayda iti komite, ti social services ken ti labor and employment, nga agimbestiga dagiti maisubmite a nagnagan dagiti mapapati a biktima ti gubat iti Lebanon tapno mapatalgedan no rumbengda a maikkan wenno saan iti pinansial a tulong.

Kinuna ni Singson nga adda listaan dagiti OFWs a biktima ti gubat iti Lebanon iti Kapitolio ket ti la imbestigaren ti nabuangay a komite no talaga a biktima iti gubat ket rumbeng a maikkan dagitoy iti pinansial a tulong.

Kinuna ni Singson a masurot ti P10,000 nga inted ni dati a Gobernador Luis “Chavit” Singson a tulong pinansial kadagiti OFWs a biktima ti gubat iti Lebanon.

Idi napan a tawen, bayat ti anibersario ti Ilocos Sur Hotline, nagiwaras ni dati a Gov. Luis “Chavit” Singson iti sag-P10,000 kadagiti umuna a batch dagiti OFWs a biktima ti gubat iti Lebanon.

Pinullo nga agtrabtrabaho iti Lebanon a taga-Ilocos Sur a kaadduanna kadakuada ti domestic helper ti nagbakuit ken napagawid ditoy pagilian gapu iti panangbomba ti Israel Lebanon ket nagkiddawda iti gobierno probinsial iti pinansial a tulong nga aramatenda iti panangabaruananda iti biag.#