Footer

Biktima ti aksidente, tinarayan ti nakaatal

NARVACAN, Ilocos Sur – Nagmalas metten daytoy biktima ta kalpasan a natinnag iti traysikel a naglugananna, naatalan iti lugan. Ket ti nakas-ang, tinarayan pay ti nakaatal kenkuana.

Segun iti report manipud iti polis ditoy, nakasakay ni Corazon Lacarte y Zaldua, 43, naasawaan, ken residente iti Barangay Quinarayan ditoy nga ili, iti likud ni Arnold Lacarte a lakayna a nagmaneho iti Honda TMX tricycle  ket iti national highway a sakup ti Barangay Bantay Abot ditoy nga ili,  mapapati a naatalan ti luganda ti goma nga inkabil ni Sonny Reyes y Payoyo, 35, naasawaan, ken residente iti Barangay Linglingay, Alicia, Isabela a kas warning device bayat ti panangtarimaanna iti naplatan a Toyota Tamaraw a kotsena iti abaga ti kalsada.

Gapu iti daytoy, natinnag ni Corazon ket mapapati nga inatalan ti di ammo ti klasena a van a naggapu iti maisungani a direksion.

Naitaray ni Corazon iti Central Ilocos District Hospital ngem indeklara ti attending physician nga awanen ti biagna gapu iti nakaro a dunorna iti ulo.

Nagderetso ti van a nagpadaya a direksion.

Nangipatulod dagiti polis iti flash alarm kadagiti kabangibangna a police stations ngem mapapati a nakalusot ti di nabigbig a nagmaneho iti van.#