Biktima ti bagyo, sinaranay ti Vigan City gov’t, DSWD

VIGAN CITY – Nasurok a P4 million ti tulong a naggapu iti gobierno ti siudad ditoy ken iti national government babaen ti Department of Social Welfare and Development, Region 1.

Kinuna ni Mayor Eva Marie S. Medina nga agdagup iti P6,000.00 ti inted ti DSWD Region 1 idinto a P14,000.00 worth of materials ti intulong ti gobierno ti Vigan kadagiti 71 a pamilia a totally damaged ti pagtaenganda. Kadagiti 571 pamilia a partially damaged ti balayda, nangted ti DSWD iti P3,000.00 idinto a P2,000.00 ti balorna a material ti inted ti Vigan city government.

Mismo nga indanon ti city government dagiti material kadagiti biktima ti bagyo tapno saandan a problema ti panaggatangda.

Kinuna ni Medina a malaksid iti cash, nangted ti DSWD iti bagas ken delata kadagiti biktima ti bagyo.

Agdagup iti P2,312,612.00 ti balor dagiti material nga intulong ti city government kadagiti biktima idinto a P2,315,612.00 ti tulong pinansial manipud iti DSWD Region 1.#