Biktima ti foul play, nasarakan iti kapagayan

CANDON CITY- Maysa a bangkay a biktima ti foul play ti nasarakan iti kapagayan iti Barangay Calaoaan ditoy siudad itay lawasana.

Nabigbig babaen ti IDna ni Noel Gatchalian,25, baro residente ti Angkileng, Sta. Lucia, Ilocos Sur, ken stockman ti maysa a promotions firm.

Nagsagaba ti biktima ti bagsol ken tagbat iti ima, rusok ken barukongna. Nakarekobre dagiti polis ti bag a naglaon iti aruatenna, 2 a sim card ken sensilio.

Segun iti report, naudi a nakita ti biktima iti uneg ti maysa a videoke bar nga adda kaduana a dua a lallaki.

Madama ti panagpalutpot ti polis no asino dagiti kadua ti biktima iti videoke bar.#