Biktima ti hit and run, nabigbigen

BANTAY, Ilocos Sur – Nabigbigen ti lalaki a naaksidente iti lugan iti kalsada nasional a sakup ti Barangay Sinabaan ditoy nga ili idi rabii ti Oktubre 28 ngem tinarayan ti nakadungpar kenkuana.

Binigbig ni Roque Rabino y Tabaldo, 26, naasawaan, residente iti Don Alejandro, Caoayan, Ilocos Sur ti biktima a ni Donrado Rabino y Tordil, 47, baro, ken residente iti Barangay Sinabaan, Sta. Catalina, Ilocos Sur.

Naireport iti polis idi agarup alas 10:45 ti rabii ti Oktubre 28 ni Rabino a biktima ti hit and run iti national highway ti nadakamat a barangay.

Intaray dagiti polis ti biktima iti Metro Vigan Cooperative Hospital ngem indeklara ti doktor a nangtaming kenkuana nga awanen ti biagna.

Iti pannakaisurat daytoy, saan pay nga ammo ti kinaasino ti nakadungpar iti biktima.#