Biktima ti hit and run, pimmusay iti ospital; drayber ti bus, nakasuan

STA. CRUZ, Ilocos Sur – Nasaklangan iti kaso ti maysa a drayber ti bus kalpasan a pimmusay ti biktima a iti ospital a nakaitarayanna kalpasan ti pannungpar.

Kinuna ti kapolisan ditoy a nakasuan iti reckless imprudence resulting to homicide and damage to property ni Loreto Nicolas y Frias, 52, naasawaan, drayber ti Dominion Bus, ken residente iti Bayambang, Pangasinan gapu iti panangdungpar ti Dominion Bus a minanehona ken ni Alex Digao y Reyes, 45, naasawaan, tricycle driver ken residente iti Barangay Bayugao Este, Sta. Cruz, Ilocos Sur idi Pebrero 8.

Nadegdegan pay ti kaso ni Nicolas gapu iti mapapati a panangtarayna iti biktima kalpasan a nadungparna.

Naipilan ti kaso maikontra ken ni Nicolas iti Candon City prosecutor’s office ket nai-docket iti babaen ti NPS number I-03-INQ-16B-00004.

Iti panagimbestiga ti polis-Sta. Cruz, nakatugaw ni Digao iti Motorstar tricycle a naiparking iti dayaen nga abaga ti kalsada idi dinungpar ti bus a minaneho ni Nicolas ti kutit daytoy a nakaipalladawan ti traysikel iti sumagmamano a metro ti kaadayona iti impact.

Nagsagrap ti biktima kadagiti adu a sugat iti bagina ket immuna a naitaray iti Sta. Lucia District Hospital para iti pannakaagasna sa naiyalis iti Candon City Hospital ngem pimmusay ditoy.

Naaresto ni Nicolas babaen ti follow-up operation nga insayangkat dagiti nagresponde a polis ket nakakustodia iti police station ditoy para iti umisu a disposision.

Kabayatanna, sabali pay a Dominion Bus ti nainbolbar iti aksidente iti national highway a sakup ti Barangay Maynganay Norte, Sta. Maria idi rabii ti Pebrero 8.

Kas maibatay iti police journal, dinungpar ti bus a minaneho ni Jefree Talledo y Arnidoval, 31, naasawaan ken residente iti Brgy. Tabiog, Bucay, Abra, ni Mary Ann Fernando y Racca, 22, awanan asawa, bayat ti panagballasiw daytoy iti kalsada a sakup ti nadakamat a barangay.

Sakbay ti aksidente, mapapati nga agringringgor da Fernando ken maysa nga Alfonso Vitales, Jr. a nakalugan iti motorsiklo nga adda iti daya nga abaga ti kalsada.

Segun dagiti di nainaganan a saksi, kellaat a bimmallasiw ni Vitales iti kalsada ket sinaruno ti biktima a nakaigapu iti pannakadungparna.

Naitaray ti biktima iti Sto. Niño Hospital iti Maynganay Sur, Santa Maria ngem naideklara nga awanen ti biagna gapu iti nagduduma a sugatna iti ulo.

Boluntario a simmuko ti drayber iti police station ti Sta. Maria.#