Biktima ti pammaltog, boluntario a reporter iti DZNS: HR Officer

VIGAN CITY – Saan a regular a reporter ni Mario Contaoi iti DZNS, daytoy ti panangilawlawag ti human resource officer ti nasao a radio station kadagiti inbestigador manipud iti Magsingal police station.

Sakbayna, napan bineripikar dagiti polis-Magsingal ti husto nga annongen ni Contaoi iti nadakamat a radio station kalpasan a rimmuar kadagiti warnakan ken uray iti radio broadcast a maysa a dati a reporter iti DZNS daytoy biktima ti pammaltog nga agdama pay nga instructor iti University of Northern Philippines.

Iti sertipikasionna a naited kadagiti polis-Magsingal, kinuna ni Marie Fe Torricer, HRO, a volunteer reporter ni Mario Contaoi iti DZNS agingga idi Marso 2016 ken naglusulos idi Hunio 6, 2016.

Iti sabali pay a sertipikasion nga inted ni Virginia T. Velasco, performance officer ti Kapisanan ng mga Broadcasters sa Pilipinas (KBP), awan a masarakan ti nagan ni Contaoi iti rekord dagiti accredited a broadcasters.

Maipalagip a napaltogan ni Contaoi iti sango ti dati a Milko Videoke Bar a masarakan sadiay Barangay San Ramon, Magsingal idi agarup 10:30 ti rabii ti Enero 6.

Mapapati a sinurot dagiti armado a suspek a naglugan iti di ammo a motorsiklo ni Contaoi bayat ti panagpaamiananna a nakalugan iti motorsiklona sada pinaltogan daytoy iti nagsasaganad.

Immuna nga intaray dagiti nagresponde a polis ni Contaoi iti Magsingal District Hospital sa naiyalis iti Northside Doctors Hospital, Bantay, Ilocos Sur ket ditoy ti nakagsatan ti angesna idi agarup 2:20 ti agsapa ti Enero 7.

Naglibas dagiti suspek iti agpaamianan a direksion ket nupay nangiwayat ti polis-Magsingal iti dragnet operation ken nangipatulod iti flash alarm kadagiti kabangibangna a police stations, negatibo ti resultana.

Iti pannakaisurat daytoy, awan pay ti suspek iti pammapatay.

Iti panangproseso ti SOCO team manipud iti PCLO, Ilocos Sur PPO iti crime scene, nakarekobreda iti innem a kapsula manipud iti cal. 45.

Nakaduktalda pay kadagiti nadumaduma a bala iti back pack ni Contaoi a pakairamanan ti tallo a naiputok a cartridge cases ti cal. 38; 2 bala para Cal .38; maysa a bala para cal .380; maysa a bala para cal 5.56mm; 3 bala para cal .45; maysa a magazine para cal .45 a nagkarga iti 7 a bala; maysa a Lenovo tab; maysa a hand-held radio (ICOM IC-V8); maysa a Rambo knife; maysa a kitchen knife; maysa a USB; ken maysa a Led retro lamps night light.

Nupay kasta, kas maibatay iti rekord manipud iti Campus Security Services Office ti UNP a pagisursuruan ni Contaoi, saan a nainbolbar daytoy iti aniaman a complaint nga impila dagiti estudiante, faculty wenno employee iti nadakamat a unibersidad.

Pinirmaan ni Nolito R. Ragunjan, Director, CSSO ti nasao a sertipikasion.#