Biktima ti pammaltog, napagbiddutan?

VIGAN CITY – Malas daytoy a lalaki gapu iti kaaddana iti dayta a lugar ken iti dayta nga oras a puon ti nakapaltogan ken nakatayanna.

Pimmusay ni John Balallo y Piedad, 46, naasawaan, agdamdamili ken residente iti Barangay Bulala, ditoy siudad, idi ala una ti parbangon iti Metro Vigan Cooperative Hospital a nakaitarayanna.

Kinuna ni Vigan City COP Jugith del Prado a nagsagrap ti biktima iti sugat iti teltel ken boksitna.

Adda ni Balallo iti dalanna nga aggawid a nakasakay iti Kawasaki Bajaj a motorsiklona idi pinaltogan dagiti di pay nabigbig a tao iti barangay road a sakup ti Barangay Ayusan idi agarup 9:50 ti rabii ti Agosto 7.

Nakarekobre dagiti nagresponde a polis iti tallo a kapsula ken maysa a bala manipud iti cal. 45 iti nakapasamakan ti krimen.

Kinuna ni del Prado nga idi kinapatangda ti biktima iti ospital a nakaitarayanna, awan met ti nadakamat daytoy a kinaririna wenno manggurgura kenkuana.

Segun iti hepe, kagapgapu ti biktima a napan nakigimong iti kapiliada idi mapaltogan.

Ngem kinuna ni del Prado a kitkitaenda no adda pakainaigan ti panagringgor ti dua a grupo iti nadakamat a barangay a napasamak sakbay ti pannakapapatay ni Balallo.

Segun ken ni del Prado, napasag ni Balallo iti asideg  ti balay ti maysa kadagiti nagriringgor.

Pammati ti polis ditoy a napagbiddutan laeng ni Balallo a nairana a limmabas iti nasao a lugar kalpasan ti panagriringgor ti dua a grupo.

Iti pannakaisurat daytoy, agtultuloy ti panagimbestiga dagiti polis mainaig iti nasao a pammapatay.#