Footer

Biktima ti pammaltog, natay iti ospital

MAGSINGAL, Ilocos Sur – Saan a naisalakan dagiti doktor ti biag ti maysa a biktima ti pammaltog ditoy nga ili itay nabiit.

Pimmusay bayat ti pannakatamingna iti ospital ni Rodolfo Tabuso, 44, tricycle driver, residente iti Barangay Manzante, ditoy nga ili gapu kadagiti grabe a sugatna.

Mapapati a napang-or pay ti biktima kalpasan ti pannakapaltogna.

Pinarakapak ti saan pay a nabigbig a gunman ni Tabuso bayat ti panagdaliasat ti traysikelna iti kalsada a sakup ti nadakamat a barangay iti agarup alas 6:30 ti bigat ti Hunio 23.

Nakarekobre dagiti polis iti  pito a kapsula ti Armalite iti nakapasamakan ti krimen.

Ti kaso ti biktima iti napalabas ti kitkitaen dagiti polis nga adda naigna ti pammapatay.#