Biktima ti pammaltog, pamiliada, napukawen interesda agdarum

TAGUDIN, Ilocos Sur – Napukawen ti interes dagiti biktima wenno ti pamilia dagiti biktima ti shooting incidents gapu ta awan met laengen ti matiliw ti kapolisan a suspek kadagitoy a krimen?

Wenno saandan nga agtuloy nga agipila iti kaso agsipud ta adda amakda nga isuda ti bueltaan dagiti kriminal nga agisaysayangkat kadagiti pammaltog, partikular kadagiti nainbolbar iti illegal nga aktibidad a kas iti droga?

Aniaman ti makagapu, maysa a biktima ti pammaltog, ken dua a kameng ti pamilia dagiti biktima ti nangibatad a saandan nga interesado pay a mangipila iti kaso maikontra kadagiti di pay ammo a suspek kadagiti pammapatay ditoy probinsia.

Idi Oktubre 12, nagpirma iti apidabit ni Rey Victor De Leon Castro, 50, naasawaan, a saanen nga interesado nga agipila iti kaso mainaig iti pannakapapatay ti kabsatna a ni Michael Angelo Castro.

Napaltogan ni Michael Angelo sadiay Barangay Del Pilar, Tagudin, Ilocos Sur idi sardam ti Septiembre 2.

Numero 9 iti drug watch list ken nakalista a No. 3 high value target ni Michael Angelo iti Tagudin police station.

Awan pay ti natiliw a suspek iti pannakapapatay ti drug personality.

Immun-una ngem daytoy, idi Oktubre 6, nagpirma iti affidavit a saanen nga interesado nga agdarum pay ni Franky Usana y Urbien @ Ikko, 29, awanan asawa ngem adda kalib-inna, mannalon, iti baet nga awan pay ti pinidut dagiti polis a suspek a nanggandat iti biagna.

Maipalagip a pinaltogan dagiti di pay nabigbig nga armado a tattao ni Usana iti mismo a sango ti balayna sadiay Sitio Dinumaran, Barangay Paratong, Magsingal idi agarup 9:50 ti rabii ti Agosto 18.

Kabayatanna, saan metten nga interesado ti ama ni Elmer Jose Galigaro y Abarquez, naasawaan, mannalon, ken residente iti Brgy Parioc 2nd, Candon City, Ilocos Sur nga agipila pay iti kaso maikontra kadagiti nangpapatay iti anakna a Eduardo Galigaro y Alcantara, aka Dugal, 28, awanan asawa ken residente iti Barangay Parioc 2nd, Candon City.

Napaltogan a puon ti nakatayanna ni Galigaro iti barangay road a sakup ti Barangay Suagayan, Sta. Lucia, Ilocos Sur idi agarup 8:28 ti rabii ti Hulio 19, 2016.

Di pay ammo ti/dagiti kriminal a nanggudas kenkuana. (Tawid News Team)