Biktima ti pammaltog, pimmusay iti ospital

STO. DOMINGO, Ilocos Sur – Nagtinnag a homisidio ti naipila a kaso ti maysa nga abogado kalpasan a pimmusay iti ospital ti maysa kadagiti menor de edad a pinaltoganna iti sanguanan ti balayna sadiay Barangay Quimmarayan idi rabii ti Hulio 7.

Malaksid iti homicide, napilaan pay iti frustrated homicide iti Regional Trial Court, Vigan City ni Atty. Jeofrey Ramos Alapot, 32, naasawaan, ken residente iti nadakamat a barangay, ket nai-docket dagitoy iti babaen ti Criminal Cases No. 7434-V ken 7435-V.

Nawayawayaan ni Ramos iti kustodia ti Sto. Domingo police station kas pammilin ni Judge Nida Bringas Alejandro ti RTC Branch 24, Cabugao, Ilocos Sur kalpasan a nakapagpiansa iti P80,000.00 ken P40,000.00.

Immuna a naitaray da Gelvin Quines y Rayray, 15, baro, 4th year high school student, ken John Edmar Mangollo, 17, baro, 1st year college student, agpada a residente iti Barangay Sto. Tomas, Sto. Domingo, Ilocos Sur iti Tolentino Clinic and Hospital babaen kadagiti kagawad ti nadakamat a barangay sada naiyalis iti Metro Vigan Cooperative Hospital, Bantay, Ilocos Sur.

Pimmusay iti nasao nga ospital ni Quines idi agarup 9:30 ti bigat ti Hulio 8.

Iti panagimbestiga dagiti polis, rimmuar ni Ramos iti balayna idi nabato iti botelia ti kongkreto nga aladda.

Sumagmamano a minutos, maysa a motorsiklo ti nagmenor iti sanguanan ti gate a nagkalubbonan ti tallo a lalaki ket mapapati a saggaysa nga imbato da Jaramillo ken Mangollo ti awan naggianna a maysa a litro a coke a nakatiruan ti ulo ti abogado.

Pinaltogan ni Ramos dagiti naglugan iti motorsiklo ket natiruan ti ulo ni ni Quines ken ti makannawan a luppo ni Mangollo. Nakataray ti maikatlo, ni Reygan Jaramillo, 18, ket naipan iti Sto. Domingo police station para iti safekeeping.

Naipan ti suspek iti St. James Hospital para iti pannakaagas ti dunorna iti ulona sa naipan iti police station ditoy para iti umisu a disposision.

Nakarekobre dagiti inbestigador iti tallo a kapsula a mapapati a naggapu iti cal. 45, ken maysa a deformed slug iti crime scene ken naipan iti police station ti MIO motorcycle a nagluganan dagiti biktima.

Saan a nasarakan dagiti polis ti paltog a pinangpaltog ni Ramos kadagiti biktima.#