Biktima ti pammaltog, pimmusay iti ospital

CANDON CITY – Pimmusay iti ospital a nakaitarayanna ti mannalon a pinaltogan dagiti armado a tattao a nagkalubbon iti motorsiklo sadiay Barangay Besalan, Sta. Cruz, Ilocos Sur idi malem ti Oktubre 10.

Indeklara ti mangngagas a nangtaming ken ni Dominador Habon y Habon, 42, mannalon, ken residente iti nadakamat a barangay, nga awanen ti biagna idi 2:40 ti malem ti Oktubre 11, maysa nga aldaw kalpasan ti panangpaltog kenkuana dagiti armado a tattao a riding in tandem.

Maipalagip a pinaltogan dagiti di pay nabigbig a suspek ni Habon bayat ti panaginanada ken ni Dante Carbonel, 32, mannalon, ken kalugaran ti biktima iti sirok ti ipil-ipil idi agarup 2:30 ti malem ti Oktubre 10.

Segun ken ni Carbonel, bayat ti panaginanada iti biktima, kellaat a nagsardeng ti maysa a nangisit a Honda TMX 155 a nagluganan dagiti suspek, bimmaba ti adda iti likud a nakaaruat iti nangisit a t-shirt sana pinaltogan ni Habon iti namitlo a daras.

Iti baet a nasugatan, nabaelan ti biktima ti nagtaray a kimmamang iti kataltalonan ngem kinamat ti gunman sana pinaltogan manen iti namitlo a daras.

Naitaray ti biktima iti Candon City Hospital para iti pannakaagas dagiti sinagrapna a sugat iti nadumaduma a paset ti bagina.

Nakasarak dagiti polis iti nakapasamakan ti pammaltog iti innem a kapsula a nagtaud iti cal .45.

Naipaima iti SOCO dagiti kapsula para iti pannakaipakat iti ballistic examination.

Iti pannakaisurat daytoy, di pay ammo ti motibo ti pammaltog.#