SANTA LUCIA, Ilocos Sur – Bimmassit ti naimula a birhinia a tabako iti daytoy a tawen.

Daytoy ti inreport ni SB Allen Habon iti Santa Lucia, agdama a chairman ti committee on agriculture, itay nabiit.

Kinunana a gapu ta bimmassit ti bilang dagiti mannalon a nagmula iti daytoy a produkto maapektaran met ti  bingay ti ili manipud iti excise tax ti tabako wenno ti maaw-awagan iti Republic Act 7171.

Pinasingkedan daytoy ni Cynthia Magallo,  agriculturist 1 iti National Tobacco Administration ken municipal coordinator idinto nga innayonna nga agarup 92 nga ektaria ti bimmabaan ti namulaan iti tabako iti daytoy a tawen.  

Itay napalabas a tawen  306 nga ektaria ti namulaan ngem iti daytoy a tawen, immabot laengen iti 214 nga ektaria.

Kinuna ni Magallo nga adu ngamin kadagiti dati a mamulmulaan iti tabako ti namulaan ti sabali a produkto kas iti mani ken nateng.