Footer

Bin-i (Maikadua a paset)

KLASEK iti TLE 10. Nalamiis ti pul-oy a yap-apros ti angin kadayta nga agsapa. Agwalopulo metro laengen iti amianan ti pagadalan ti baybay. Naungor pay dagiti dalluyon.

“Nakapasaak met laeng, sir?” inamad a dagus ni Lyra Mae idi malpas ti panagkararag a kanayonko a panglukat iti klasek.

“Aniat’ panagriknam?” inyisemko kenkuana.

“Amangan no saan a makaabot iti cut-off dagiti mapadayawan, sir,” limmidem ti nakain-inosente a rupana.

“Maammuam ‘ton maala ti nagannakmo ti card-mo.”

“Kaano gayam ti Card Day, sir?” inamad ni Keithlyn. Kadagupan kadakuada a lima a babbai, isuna ti aw-awaganda iti ‘Mahal.’ Kasano, saan kano ngaminen a timmayag manipud naghayskul. Ketdi, ikatkatawana laeng.

“Iti sumuno a lawas.”

“Agpayso a Sabado itan ti Card Day, sir?” insalpika ni Lito nga itay pay a dusngit a dusngit iti tugawna. Pasaray agkulangtotda ken ni Ronnie a kaabayna. Sangapuloda a lallaki iti klasek.

“Yes, class!” intung-edko. “Awan maaramidantayo ta dayta ti pammilin. Saanen a kas idi a kadagiti school days. Tapno di kano maapektaran ti panagadalyo.”

“Ania met!” immisugsog ni Nathan. “Kasanon, sir, ket kadayta nga aldaw ti isusuknalmi?”

“Mapanka latta, a, balong,” kinunak. “Ilaklak-ammo lattan da tatang ken nanangmo nga umay maki-Card Day.”

“Saan a mabalin, sir. Masapul a kumpletokami. Agunget ‘diay pastormi no aglangankami.”

Napasennaayak. “Ipalawagmonto, balong, a dayta ti pammilin. Madaksankami no saankami nga agtungpal. Maawatanna met ngata.”

Nagngilangil laeng ni Nathan. “Masapul kano nga unaenmi ti obligasionmi iti Apo, sir.”

“Maawatanmi dayta, balong. Ngem sumursurotkami laeng iti pammilin. Madaksankami no dikami agtungpal. Padasemto laeng nga ilawlawag…”

“Pimmasakami a lallaki, sir?” insengngat ni Rocky.

“Addan sa dua a saan,” insuotko.

“Siak daydiayen!” inkudkod ni Dinan, ti kalakayan iti klasek. Namindua a nag-Grade 9 ta sabali kano ti nasumokna iti kallabes. Inyawyaw ti barkada ti panagbasana.

“Siak met ‘diay maikadua!” inngiit pay ni Zommel. Kadakuada a lallaki, isu ti karapisan. Sutil. Napagsangitna aminen dagiti lima a babbai a kaklasena. Kanayon a mai-office.

Ti pakaisemak, ti istoria itan dagiti kaklasena a kabutengna gayam ti igges. Isu a no mangsutilen, kampay idi, mangtaray a manggammat iti bulong ti masetas wenno kayo dagiti sutilenna sa ipuruakda kenkuana. Igges! iriawda kenkuana. Permi kano a kulkulagtit no kua ni Zommel!

“Saankayon nga agladingit,” kinunak idi agangay. “Pimmasakayo amin.”

“Yeheyyy!!!”

“Ngem…” impugsatko a dagus iti ragragsakda, “kiddawek laeng nga igaedyo pay ti agbasa. Nagbaba ti increase-ko kadakayo. Awan pay ti maysa a porsiento. Agasem dayta 0.30 nga increase?”

“How to plus and minus your increase, sir?” rugian manen ni Jerry ti kinaangawna. Naruamak pay ketdi kenkuanan.

Inlawlawagko a madagup ti final grade-da iti tunggal grading period sa mabingay iti bilangda. Ti rummuar, maikompara iti naglabas a grading period. I-subtract laeng iti agdama ti napalabas tapno maala ti increase. No positive ti rimmuar, kayatna a sawen, adda naadal dagiti ubbing kenka. No negative, agparparang a defective (saan nga effective) teacher-ka. Iti ababa a pannao, awan naadalda kenka.

Ket dayta ti diak kayat a mapasamak. Naimbag ta adda pay laeng increase-ko kadakuada a 0.30. Ngem iti AP 9 ken TLE 9 a subjects-ko, negative ti rimmuar!

“Kasdiay gayam, sir…” intungtung-ed ni Jerry. “Pakausaranna ngay?”

Imbagak.

“Naglaka ti solusionna, sir,” indanog ni Dinan iti ima ti tugawna. “Iparebiumto kadakami ti ipaeksammo… period!”

Nagkakatawada.

“Agrebrebiutayo met sakbay ti eksam aglalo no nalpastayo aminen a topiko.”

“Agpayso, sir,” insungbat ni Jhoyze, “ngem saan met a ‘diay eksakto a saludsod iti eksam ti iparparebium.”

“Siempre, a,” kinunak. “At least, ma-refresh iti utekyo dagiti naklasetayo. Baringringekto man iti eksamyo, addanto latta pamalpalatpatanyo. No nagrebiukay’ la ketdi!”

“Uhu, madi, a, sir!” immusiig ni Dexter. “’Tay koma sibubukel a saludsod iti eksamen, a, agraman ti sungbatna.”

“Dikay’ pay ket nagsuerten!”

“Kasta met dagiti dadduma, sir,” intakder pay ni Dinan.

“Aniat’ kayatmo a sawen?”

Ngem saannakon a nasungbatan ni Dinan ta apagisu a naguni ti buzzer.

“Break na… yahooooo!!!” impalagapagda pay.

Napawingiwingak laengen. Ania la ketdin dagitoy nga ubbing! Saan a bale ta addanto pay panawen a panagdamagko.

(ADDA TULOYNA)