Bingay iti RA 7171, prioridad maipaay farm to market roads

SAN JUAN, Ilocos Sur – Inyimplementaren ti lokal a gobierno ti San Juan nga idadauluan ni Mayor Benjamin Sarmiento ti pannakakongkreto ti kalsada nga agturong iti penned iti Sitio Tapao, Barangay Camangaan agingga iti Barangay Barbar ditoy nga ili.

Segun iti mayor, naponduan ti proyekto iti P1 million a prioridad a naiyimplementar tapno nadardaras ti panagdaliasat dagiti mannalon no mapanda agpalayas wenno agputtot iti talonda iti nasao a penned.

Impatalged ni Mayor Benjamin Sarmiento nga apaman a mapasangpetda ti bingay ti munisipio manipud iti RA 7171, prioridad a maipan iti farm to market roads a proyekto ti lokal a gobierno nga indauluanna.

Ti agrikultura ti maysa kadagiti prioridad a programa ni Sarmiento a kangrunaan a mailatlatangan manipud iti bingay ti munisipio iti RA 7171.

Ti San Juan ti maysa kadagiti kadakkelan iti produksion iti tabako ket dakkel ti bingay daytoy nga ili manipud iti excise tax ti sigarilio.#