Footer

Bingay ti probinsia iti RA 7171 maruk-atan

VIGAN CITY – Adda manen sumangpet a bingay ti probinsia manipud iti excise tax ti tabako, daytoy ti inwaragawag ni Gov. Luis “Chavit” Singson itay lawasna.

Segun iti gobernador, aggigiddan a maruk-atan ti pondo para kadagiti uppat a probinsia nga agmulmula iti Birhinia a tabako a pakaibilangan ti Ilocos Norte, Ilocos Sur, La Union ken Pangasinan ken ti Abra.

Kanaig daytoy, impeksa ni Singson ti panagyamanna ken ni Pres. Benigno Aquino III gapu iti panangparuk-atna iti bingay dagiti tobacco producing provinces manipud iti R.A. 7171.

Kinuna ni Singson a kasupadi daytoy iti irakrakurak dagiti kritikona nga awanen ti maruk-atan a pondo ti R.A. 7171 agsipud ta saan a kapartiduan ti gobernador ni Pres. Aquino.

Indagadag ti gobernador kadagiti local chief executives ti panangiprioridadda iti mabingayda iti RA 7171 para iti pagimbagan dagiti mannalon.

Maipalagip a nabingay ti apag ti probinsia iti nasao a linteg iti 30 porsiento para iti probinsia, 30 porsiento para iti distrito, ken 40 porsiento para kadagiti munisipalidad.

Ti Ilocos Sur ti kadakkelan ti bingay iti RA 7171 agsipud ta 70 porsiento ti produksion ti tabako ket agtaud ditoy a probinsia.

Pinutar ni Singson ti nasao a linteg idi 1992 idi isu diputado ti umuna a distrito ti Ilocos Sur.

Kabayatanna, impalgak ti gobernador a sumangpeten dagiti materiales ket agtuloytuloyen ti konstruksion ti Farmers’ Convention Center.

Kinuna ni Singson a dakdakkelto ti maipatakder a convention center ngem mapagbalin nga otel agsipud ta problema ti agkurang a paggianan dagiti delegado wenno makikumbension.

Nadakamat ti gobernador a ti kadakkelan nga otel iti probinsia ket nasurok laeng a 40 a kuarto ket no rinibu dagiti agsangpet a makikumbension, dakkel a problema ti paggiananda isu a kapilitan a mapanda iti La Union, ken Ilocos Norte.

Kinunana a “nasayaat ti kaadda” ti convention center ti Vigan City, ngem problema latta ti nakurang a pagdagusan dagiti makikumbension.

Segun iti gobernador, madama ti negosasion kadagiti private investors para iti pannakaipatakder ti nasao a convention center dagiti mannalon ngem kabayatanna, ipumpunduan ti gobierno tapno dardaras malpas santo maipaima kadagiti negosiante tapno isudanton ti mangituloy.#