Footer

Bingay ti Vigan City iti R.A. 7171, nailatang iti inprastruktura, livelihood, kooperatiba

VIGAN CITY –  Agdagup iti  P1,154,595.00 manipud ti bingay daytoy a siudad iti R.A. 7171ti inaprobaran ti konseho ditoy para iti inprastruktura, kooperatiba ken livelihood projects.

Agdagup iti P577,297.50 wenno 50% iti bingay ti siudad iti tobacco excise tax kas intuding ti R.A. 7171 ti nailatang iti inprastrukturaa pakairamanan ti konstruksion ti farm-to-market roads ken dagiti pasilidad.

Sagtunggal P288,648.75 wenno  25% ti mapan iti cooperatives ken livelihood projects.

Ngem linagidaw ni Councilor Benjo Versoza dagiti naaramid a  farm-to-market roads iti siudad ta akikid dagitoy ket narigat nga agsabat ti dua a lugan.

Insingasing ni Konsehal George Villanueva a karaman ti sangguniang panlungsod iti panagplano kadagiti proyekto ti siudad.

Ngem kinuna ni Konsehal Loreto Quibilan, chairman ti appropriations ken finance committee nga agaprobar ken agpanday ti linteg laeng ti konseho ket saannan nga akem ti makipagplano kadagiti proyekto. Nupay kasta, kinunana nga idanonna daytoy a singasing iti executive department.

Kiniddaw pay ni  Villanueva ti nasayaat a pannakaipataray dagiti pundo a maipaay kadagiti kooperatiba tapno saanda a masayang.

Inkalintegan ni Quibilan nga awanen ti dati a manera ti panagpautang kadagiti kooperatiba ken saan a dole out dagiti pautang ket napintas itan ti pannakaipataray dagiti pundo a maipapaay iti livelihood ken dagiti kooperatiba ditoy siudad.#