SAN ILDEFONSO, Ilocos Sur – Nagtungpal iti pammagkong ti selebrasion ti maysa a kasangay iti Barangay Sagsagat ditoy nga ili idi sardam ti Disiembre 4.
Gapu iti pannakabagsol ti makannigid a paset ti tianna, naipaagas iti Gabriela Silang General Hospital ni Alfredo Villegas y Navarro, 29, residente iti nadakamat a barangay idinto a boluntario a simmuko ni Alfonso Tacla, Jr. y Rafin, 26, baro, kalugaran met laeng ti biktima.
Naammuan iti report a bayat ti panaggiinom da Villegas ken Tacla ken kakaduada, naparnuay ti nabara nga argumento iti nagbaetanda.
Pimmidut ni Villegas iti botelia ti gin ket ginandatna a pang-oren ti suspek ngem nagginnagawanda ken ni Tacla agingga a mapapati a nakapidut met ti suspek iti kutsilio ket binagsolna ti biktima.#