Bishop David William Antonio, naisaaden nga Obispo ti Ilagan

ILAGAN CITY – Naindaklan a sagut dagiti taga-Ilocos Sur a maysa nga anak ti mannalon ken patanor ti ili a Santo Domingo ti naisaad nga Obispo ti Ilagan a mangaywan kas pastor kadagiti 1.2 a Katoliko iti intero a probinsia ti Isabela.

Naisaad ni sigud a Nueva Segovia Auxiliary Bishop David William Valencia Antonio kas Obispo ti Ilagan kabayatan ti napnuan-solemnidad a canonical installation rite a nairapit iti Nasantuan a Misa sadiay Saint Michael Archangel Cathedral, Gamu, Isabela idi bigat ti Pebrero 12, 2019, babaen ken ni Papal Nuncio to the Philippines Archbishop Gabriele Giordano Caccia. Nakikaysa iti Misa da sigud a Cotabato Archbishop Orlando Cardinal Quevedo, Tuguegarao Archbishop Sergio Utleg, Nueva Segovia Archbishop Marlo Peralta ken dadduma pay nga obispo ken papadi iti Amianan a Luzon. Nakipagrambak met dagiti adu a relihioso ken laygo manipud iti Luzon.

Nagbalin a nabara ti panangpasangbay dagiti agindeg iti Isabela ti baro nga obispoda ta naideklarar nga awan-serrek iti gobierno iti Ilagan City ken Gamu. Alas singko pay laeng iti parbangon ket nagsangpeten iti katedral dagiti adu a delegado dagiti nadumaduma a parokia, ken naggapu kadagiti nagduduma a probinsia pakairamanan ti Ilocos Sur ken Occidental Mindoro. Nagbalin a nainget ti seguridad iti aglawlaw ken uneg ti baro ken nalawa a katedral a nakaideployan dagiti adu a polis ken militar gapu iti napasamak a panagbomba iti Our Lady of Mount Carmel Cathedral sadiay Jolo, Sulo a nakatayan dagiti 21 a tattao. 

Indauluan ni Isabela Governor Faustino Dy III dagiti opisial ti gobierno iti probinsia pakairaman dagiti kongresista ken mayor dagiti ili ken siudad. Nairaman dagiti opisial iti Ilocos Sur a nakikaysa iti pasken ni sigud a Governor ken agdama a Narvacan Councilor Luis β€œChavit” Singson, ken Tagudin Mayor Roque Versoza, Jr. Nakipagkaykaysada a nakipagrambak ken nakipagtulod ti patanor ti Ilocos Sur nga agpaayen a pastor ti Katoliko a Pammati iti intero nga Isabela.

Ni Bishop Antonio, 55, ket naipasngay ken dimmakkel sadiay Santo Domingo, Ilocos Sur. Lineppasna ti Primary Education sadiay Nagtupacan Primary School, ken Elementaria iti Lussoc Elementary School. Nagadal iti Sekundaria iti Benito Soliven Academy ken Immaculate Conception Minor Seminary. Tinurposna ti Philosophy iti San Pablo College Seminary, ken Theology iti Immaculate Conception School of Theology. Lineppasna ti Licentiate in Sacred Theology ken Doctorate in Sacred Theology sadiay Catholic University of America.

Sigud a nagpaay a professor ken Rector ti ICST; Parish Priest ti St. John Sahagun Parish, Candon City ken St. Lucy Parish ti ili a Santa Lucia, Vicar General ken Auxiliary Bishop ti Nueva Segovia. Kalaksidan ti akemna kas Obispo ti Ilagan, isuna pay ti Apostolic Administrator ti Apostolic Vicariate ti Diocese of San Jose, Occidental Mindoro.