Bisikleta, motorsiklo, nagdungpar

SAN VICENTE, Ilocos Sur – Dua a lalaki ti nayospital kalpasan a nagdungpar dagiti luganda iti agsapa ti Abril 6 iti provincial road daytoy nga ili.

Nagsagrap iti dunor iti ulo ken paset ti bagida da Benedicto Rentiquiano y Rebullo, 69, naasawaan, mangngalap ken residente iti  Barangay Bantaoay, ditoy ken ni Sonny Fidel y Rabacal, naasawaan, newspaper dealer, ken residente iti Barangay Bayubay ditoy met laeng nga ili.

Rimmuar iti panagpalutpot nga agpada nga agpaamianan ti bisikleta a nagluganan ni Rentiquiano ken ti motorsiklo a minaneho ni Fidel ket nagobertek ni Fidel ngem kellaat met a nagsikko a nagpakannigid ti bisikleta a puon ti nakadungparan kenkuana ti motorsiklo ken pannakaikrasda.

Nakaro a nadadael dagiti dua a lugan.#