SINAIT, Ilocos Sur – Leksion daytoy kadagiti mangsalda kadagiti maitukon nga alikamen a dida ammuen nga umuna no kukua met laeng ti nangisalda wenno tinakawna.
Kapilitan nga inted ni Jimuel Icari, taga-Barangay Namnama, ditoy nga ili, ti sinaldaanna a mountain bike manipud ken ni Rodel Igarta y Halili, 42, naasawaan, ken agdama nga aggigian iti Barangay Namnama, Sinait, agsipud ta kukua gayam ni retired SPO4 Edmund Ines Ibea a pagpapaayan ti nangisalda a katulong.
Sakbayna, idi agsapa ti Disiembre 30, naduktalan ni retired SPO4 Edmund Ines Ibea a mapukpukaw ti Phantom a bisikletana nga agbalor iti P6,500.00.
Impalgak ti apona a ni Jan Amiel Caesar Abella, 13, Grade 8, a nakitana ni Igarta, iti agarup 9:30 ti rabii a rimmuar iti inaladanda a nakasakay iti bisikleta.
Kalpasan ti panangireportna iti polis iti insidente, sinapul ni Ibea ti katulongna ket nabirokanna daytoy iti kamaisan sadiay Barangay Ricudo iti dayta met la a bigat.
Tinengngel ni Ibea ti suspek sana impaima kadagiti nagresponde a polis.
Bayat ti pannakapalutpotna, impudno ni Igarta nga insaldana ti bisikleta ken ni Icari iti P1,500.00.
Naipan ti suspek iti police station ditoy para iti umisu a disposision.
Problema ita ni Icari no kasano a mapasublina ti kuartana a pinangsaldana iti bisikleta.#
Â