Bisita a legislators, dinayawda ti sangguniang panlungsod ti Vigan

VIGAN CITY – Dinayaw dagiti simmarungkar a legislators manipud iti Albay ti inobasion nga ipakpakat ti sangguniang panlungsod ditoy, daytoy ti impadamag ni Vice Mayor Lourdes Baquiran itay nabiit.

Segun iti bise mayor, kaadduanna kadagiti bumisita iti Vigan City ti dimmawat kadagiti programa, ordinansa, ken resolusion a pagadawanda wenno ipakatda iti ili wenno siudad a naggapuanda.

Maysa a nakasdaawan ken dinayaw dagiti bisita a konsehal ti pannakaselebrar ditoy siudad ti Legislator’s Week agsipud ta saan a maang-angay daytoy nga okasion iti ilida.

Maipalagip nga idi bimmisita ditoy siudad dagiti agtuturay ti Makati City, maysa a napidutda nga ipakat iti panagputarda iti linteg iti premier city ti pagilian  ti pannakaisayangkat ti paperless session no sadino a naikkan dagiti city councilors iti bukodda a laptop tapno ditoyen ti pangbasaan ken pangrebisaranda kadagiti resolusion ken ordinansa a matratar iti konseho.#