Bitong Elem. School, ibagianna ti Ilocos Sur iti marching band competition

GALIMUYOD, Ilocos Sur – Ti Bitong Elementary School ditoy nga ili ti mangibagi iti probinsia ti Ilocos Sur iti marching band competition a maangay iti Mall of Asia inton Abril 8.

Segun ken ni Konsehal Kulapu “Roy” Trinidad, agdagup iti nasurok 40 nga ubbing ti kameng ti marching band a makipartisipar iti nasao a kumpetision.

Maipalagip a ti nasao a pagadalan ti nangiyalat iti kampeonato iti marching band competition, kas maysa kadagiti tampok a pabuya iti panangselebrar ti Ilocos Sur iti Kannawidan Ylocos Festival a naangay idi Enero 29-Pebrero 8, 2015.#