Black propaganda kontra Cobangbang, maiwarwaras

CABUGAO, Ilocos Sur – Linagidaw ni Mayor Edgar S. Cobangbang, Jr. ti wagas ti pammadpadakes ti kampo ti kasupangetna iti politika nga inranada pay met iti panagpiesta daytoy nga ili.

Kinuna ni Cobangbang a masurot koma ti proseso ti linteg, saan ketdi a pammadpadakes idinto nga innayonna a mamati a kolor politika ti adda iti likudan daytoy nga smear campaign maikontra kenkuana.

Bayat ti parada iti panagpiesta ti Cabugao, mapapati a naiwaras kadagiti tattao dagiti polieto a nakaipalaonan ti kaso a murder a naipila maikontra ken ni Cobangbang.

“Agtutorda koma met ta adda korte a mangrisut iti daytoy,” kinuna ni Cobangbang kas reaksionna sana inyunay-unay nga iti daytoy nga inaramid ti kampo ti kasupangetna iti politika, “bimmaba ti level” ti panagkitkita ti mayoria  iti “kastoy klase a tattao”.

Kinuna pay ni Cobangbang a nupay diniskualipika ti Comelec ti kasupadina, saanna a pawilan ti panagkampania daytoy.

“No kayatna, uray agkukuyogkami pay nga agkampania,” kinunana idinto nga indagadagna ti panagtitimpuyog ken panagmaymaysa tapno masolbar dagiti makitana a problema ti ili a Cabugao.#