Boarding house, natakawan

VIGAN CITY – Sabali manen a boarding house ti natakawan sadiay Barangay Tamag ditoy siudad idi malem ti Nobiembre 16.

Naireport iti polis a natakawan ti Atmie 24 boarding house a nakabiktimaan da Harikrushn Laheri y Ashvinbhai, 18, baro; Parth Padya y Rohitbha, 18, baro; ken Harsh Varsadiya y Paresbhai, 19, baro, Indian national nga agpapada nga estudiante iti University of Northern Philippines.

Segun iti police blotter, inridep dagiti tallo a biktima iti agarup 12:00 ti malem iti nadakamat a petsa ket idi nakariingda, naduktalanda nga awanen ti gamitda a Lenovo laptop PC, HP laptop PC ken Samsung Quatro cellphone.

Mapapati a ti ridaw iti kuarto dagiti biktima ti simrekan ken rimmuaran dagiti di nabigbig a suspek.#