Bodega ti negosiante, natakawan

VIGAN CITY – Tinakawan dagiti mannanakaw ti bodega ti maysa a negosiante a masarakan iti Barangay Ayusan Norte ditoy siudad itay nabiit.

Iti report a dimmanon iti polis ditoy siudad, sinerrek dagiti di pay nabigbig a suspek ti bodega ni Terio Go, negosiante, ket kinurimesda ti nagduduma a piesa ti 10-wheeler truck ken bateria a mapattapatta nga agbalor amin iti P50,000.

Naduktalan ti panagtakaw idi malem ti Mayo 16 babaen ken ni Eddie Arce, empleado ti negosiante, idi nasukalanna a nadadael ti interlink wire iti likud ti nasao a bodega a mapapati a simrekan ken rimmuaran dagiti mannanakaw.

Madama ti panagpalutpot dagiti polis mainaig iti nasao a panagtakaw.#