Bomb threat – false alarm

VIGAN CITY – Palso ti bomb threat a naipatulod babaen ti telepono iti Gabriela Silang General Hospital idi aldaw ti Marso 4 ngem nangidateng iti amak ken buteng kadagiti pasiente ken empleado ti ospital.

Napagsubli met laeng dagiti pasiente iti kuartoda kalpasan a napatalgedan dagiti nagresponde a polis nga awan ti peggadda iti bomba kas naitelepono iti maysa a security guard ti nasao nga ospital.

Timmawag iti Vigan City police station ni Wilfredo Pilar, security guard ti GSGH, ket nagkiddaw iti tulong kadagiti otoridad kalpasan a nakaawat ti ospital iti telephone call manipud iti maysa a caller a nagpabigbig a taga-Nagsangalan ditoy siudad nga adda naikabil a bomba iti uneg ti ospital, partikular ti Pedia ward.

Dagus a nagresponde dagiti polis nga indauluan ni Deputy Chief of Police Police Senior Inspector Mario Ragasa Badiola iti nasao nga ospital tapno mangisayangkatda iti inspeksion ken crowd control ken iti pannakaiyalis dagiti pasiente babaen ti superbision ni PIDMS Police Supt. Maximo A. Taclas ken Chief PIB Police Supt. Panfilo R. Racho ken iti tulong ti EOD a nakabase iti Ilocos Sur Provincial Police Office.

Iti inisial nga inbestigasion dagiti polis, idi agarup 10:20 ti bigat ti nadakamat a petsa, uppat a nagsasaruno a tawag iti telepono ti naawat ni Blesilda Adviento y Dacquel, MedTech I ti nasao nga ospital, a mapapati a naggapu ken ni Vangie Acena y Viado, 35, naasawaan, maestra, ken residente iti Barangay Nagsangalan, Vigan City a nangipakaammo a nakaawat iti impormasion nga adda bomba a naikabil iti uneg ti ospital, kangrunaanna iti Pedia Ward.

Uray ti security guard ken ti duty staff nurse a nabigbig a maysa a Sylvia Lorma Ragasa ket mapapati a nakaawatda iti telephone call manipud met laeng ken ni Acena ket inreportda daytoy ken ni Dr. Pablo Quedado, Provincial Health Officer 1.

Naibakuit dagiti pasiente iti ruar, partikular iti sanguanan ti flag pole idinto a nangisayangkat dagiti personnel ti EOD iti nainget nga inspeksion iti intero a pasdek tapno birokenda ti naireport a bomba.

Nupay kasta, negatibo ti resulta ti panagbirok dagiti polis ket napagsubli met laeng dagiti pasiente iti kuartoda.

Iti follow-up investigation, inimbitaran dagiti polis ni Acena a mapan agpalawag iti police station ket nasdaaw laengen daytoy iti pannakaaramat ti naganna iti mapapati a bomb threat.

Kinuna ni Acena a saan nga immaw-awag iti ospital ken saan nga isu ti nagpakdaar nga adda bomba a naikabil iti Pedia Ward.

Agtultuloy iti panagimbestiga dagiti polis no asino ti immawag iti Gabriela Silang General Hospital mainaig iti palso a bomb threat.

Kitkitaen dagiti polis ti anggulo a maysa a manglokloko ti timmawag iti ospital, wenno maysa kadagiti saan a napagustuan a pasiente, wenno maysa a manggurgura ken ni Acena isu nga inaramatna ti nagan daytoy iti palso a bomb threat.#