Bomba, naiballaag a mapabettak

VIGAN CITY – Agtultuloy ti panagimbestiga dagiti polis no asino ti nangipatulod iti text message nga adda naikabil nga eksplosibo iti Gabriela Silang General Hospital idi bigat ti Enero 24.

Apaman a naawatda ti pulong manipud iti GSGH, nagresponde ti EOD ken polis manipud iti Vigan ket sinukimatda dagiti nadumaduma a paset ti ospital no adda nailemmeng a bomba ngem negatibo ti resultana.

Suspetsa ti polis a kabagian ti maysa a pasiente ti nangipatulod iti text message manipud iti selpon numero 09263271987 a nakailanadan ti ballaag: “Nauyong dagiti nurses ken doctors dita nga hospital ti busor ko kadakayo adda inkabilmi nga pakatayan yo amin dita.”

Kanaig daytoy, inawis ti polis-Vigan ti kabagian ti maysa a pasiente a naitaray iti GSGH tapno mapagsaludsodan.

Mapapati a nairita ti maysa a doktor ti GSGH iti maysa a nars manipud iti maysa a pribado nga ospital gapu ta saan a nakikoordinar nga immuna kadakuada idi intarayda ti pasiente.

Segun iti report, naawat ti emergency hotline ti GSGH ti ballaag idi agarup 9:31 ti bigat ti Enero 24 ket mapapati a naipatulod iti asideg laeng ti nasao nga ospital, partikular iti asideg ti Barangay Salindeg ditoy siudad.#