Botcha, nailibas a mailako iti tiendaan

VIGAN CITY – Tapno adda pagmennamennaanna, mapakatan iti kadagsenan a multa ti negosiante a nagipuslit iti botcha iti tiendaan publiko ditoy nga inlaokna kadagiti regular a naparti a karne sana impaangkat ken indeliber kadagiti tindera  ken sukina a restaurant ken agar-aramid iti longganisa.

Daytoy ti imbatad ni Vigan City Slaughterhouse Master Dr. Arnulfo Quitoriano kalpasan a nasukalanda ti maysa a partidor a nagipuslit iti botcha a baboy iti tiendaan publiko sana impaangkat iti maysa nga aglaklako iti karne.

Kinuna ni Quitoriano a naduktalanda daytoy illegal nga aramid kalpasan a nasukalanda ti maysa a tindera nga agnagan iti Ellen Cariaga, taga-Bantay, Ilocos Sur, nga adda nailaok a botcha kadagiti tagilakona a karne ti baboy iti puestona iti uneg ti tiendaan publiko ditoy siudad.

Idi sinitar da Quitoriano ni Cariaga, impalgakna nga inangkatna dagiti karne a lakona ken ni Jojo Lazo, partidor a taga-Bayubay, San Vicente, Ilocos Sur.

Idi damo, pinaglibakan ni Lazo nga isu ti naggapuan dagiti botcha a tagilako ni Cariaga ngem idi nakitana dagiti polis a pinaayaban ni Quitoriano, inannugotna nga isu ti nagideliber iti nasao a karne.

Mapattapatta nga aganay 20 kilos dagiti nailaok a botcha. Ngem posible nga ad-adu pay agsipud ta addan dagiti naideliber ni Lazo kadagiti sukina nga agor-order kenkuana iti karne ti baboy.

Nupay kasta, impetteng ni Lazo a ni laeng Cariaga ti inikkanna iti botcha a lakona.

Ngem kinuna ni Quitoriano a nagsalungasing ni Lazo iti RA 10536 ket ipakatda ti kadagsenan a multa kenkuana tapno adda pagmennamennaanna.

“Pagmultaenmi… saan a mabalin daytoy… natay la ngaruden, saanen a mabalin a sidaen, ipasidada pay laeng kadagiti tattao,” kinuna ni Quitoriano.

Innayon ni Quitoriano nga agingga a saan a mabayadan ni Lazo ti multana, maparitan nga aglako iti tiendaan.

Mapapati a nainagan ti stall iti asawa ti kabsat ni Jojo Lazo a ni Cesar Lazo, dati a presidente dagiti meat vendors iti siudad, ti puesto a pagtadtadan ken pagisupotan ni Jojo kadagiti karne ti baboy a naparti iti slaughterhouse sakbay a maipaangkatda kadagiti aglaklako iti tiendaan ken maideliberda kadagiti nagorder a restaurant ken agar-aramid iti longganisa.

Maipalagip a nainbolbar ni Cesar Lazo iti mapapati a panagipuslitan kadagiti takong iti quarantine checkpoint iti Tagudin, Ilocos Sur iti baet nga adda pammilin ni Governor (idi) Luis “Chavit” Singson a maiparit ti agiserrek iti oversized a baboy iti probinsia.

Mapapati pay a nagipuslit ni Lazo kadagiti impaangkatna a karne ti baboy iti tiendaan ti Vigan a saan a naglasat iti pagpartian iti siudad.

Kabayatanna, kinuna met ni Bonifacio Corpuz, market master, nga uray ti tindera a natiliwan a nagangkat iti lakona a botcha ket mapagmulta tapno adda pagmennamennaanna.

Kanaig daytoy, inungtan ni Corpuz ti inspektor a natudingan nga agbantay iti likud ti tiendaan ta saanna a nasiputan ti panangipuslit ni Lazo kadagiti botcha.

Kinuna ni Quitoriano a nalaka a mailasin ti karne a botcha agsipud ta  nagalis a pumigket no iggaman ken adda buyoknan no angoten. Kasta met a nangisit ken nalabbaga dagiti paragpag agsipud ta saan a napadara ti baboy sakbay a naparti.

Kinuna pay ni Quitoriana a natatakan dagiti karne ti baboy a mailako iti tiendaan ti Vigan kas pammaneknek a naparti iti slaughterhouse.

Iti babaen ti RA 10536, naikalawa ti sakawen ti “hot meat” ket karamanen ti “botcha”, cold slaughter or “double dead”) (karne manipud iti nagsakit wenno natay nga animal) kasta met dagiti illegal a naangkat a karne ken dagiti produkto ti karne, nga agpada a saan a mapagmulta iti babaen ti RA No. 9296 ngem iti babaen ti RA No. 10536 maikonsideran a panaglabsing maikontra kadagiti tattao nga addaan saan laeng a multa no di pay pannakaibalud kas penalties.#