Boundary dispute, di pay marisut

VIGAN CITY – Saan pay a narisut ti boundary dispute iti nagbaetan ti ili ti Villaviciosa ken San Emilio agsipud ta adda pay banag a saanda a pagsinnurotan.

Nupay kasta iti joint session ti hunta probinsial ti Ilocos Sur ken Abra, napagtinonganda nga agsinnublat iti venue bayat ti pannakadengngeg iti dispute iti nagbaetan dagiti dua nga ili.

Kapaliiwan ti maysa a bokal ditoy Ilocos Sur a no mapan iti panagbibinnutos, mangabak latta ti probinsia a pakaangayan ti dialogue agsipud ta ayonan nga ayonan ti bise gobernador, kas presiding officer, ti probinsiana.

Kabayatanna, naammuan nga imparipirip dagiti agtuturay ken agindeg iti Villaviciosa a saanda a tubngaren ti pannakaisubli ti daga a tuntuntonen ti San Emilio no la ketdi saan a maapektaran ti internal revenue allotment ti ilida.

Agbatay ti IRA iti land area ti maseknan nga ili.#