Boundary dispute, manamnama a marisut iti mabiit

VIGAN CITY – Ikkan pay ti sangguniang panlalawigan ti Ilocos Sur ken ti Benguet dagiti tallo nga ili nga addaan boundary dispute a mangresolbar iti problemda.

Kinuna ni Bokal Robert Tudayan a manamnama a kalpasan ti panagsasango dagiti kameng ti sangguniang panlalawigan ti dua a probinsia, pinal a maresolbaren ti parikut a pakaseknan ti pagbeddengan iti nagbabaetan ti Kibongan ken Bakun iti Benguet ken iti Sugpon, Ilocos Sur.

Kinuna ni Tudayan a pinaisubmiten ti sangguniang panlalawigan ti Ilocos Sur ken Benguet kadagiti maseknan nga ili dagiti dukomento a mangpaneknek nga isuda ti agtagikua iti nagbedngan a mapapati a sakupda para iti pannakaresolbar ti problema.

No saan latta nga agsinnurot dagiti tallo nga ili, dagiti dua a sangguniang panlalawigan ti mangresolbar ti nasao a  problema, kinuna ti bokal.#