Footer

Boundary dispute ti San Emilio, Tubo, awan pay pakarisutanna

VIGAN CITY – Nagtignay dagiti agtuturay ditoy probinsia tapno maalay-ayan ti tension iti nagbaetan dagiti opisial ken residente ti Barangay Supo, Tubo, Abra ken ti Barangay Matibuey, San Emilio, Ilocos Sur gapuen iti dida panagkikinnaawatan maigapu iti boundary dispute.

Iti pannakipatpatang ni Bokal Roberto Tudayan iti lokal a media itay nabiit, kinunana a naparnuay ti tension iti nagbaetan dagiti dua a lugar idi mapapati a pinuted dagiti opisial ti Barangay Supo, Tubo, Abra ti linia ti koriente a dumanon iti Barangay Matibuey, San Emilio, Ilocos Sur ket kas reaksionda, pinaserraan met dagiti lumugar ti Matibuey ti dalan a pagnaan dagiti taga-Supo, Tubo, Abra a sumalpot iti lugarda.

Mapapati a napasamak ti insidente kalpasan nga awan ti naglawagan ti panagpapatang dagiti opisial ti Barangay Supo, Tubo, Abra ken dagiti opisial ti Matibuey, San Emilio mainaig iti susikda iti nagbeddengan.

Kinuna ni Tudayan a kasapulan a mapukaw ti tension iti nagbaetan dagiti dua a lugar isu a nangisingasing iti pannakaangay ti sabali a panagpapatang iti nagbaetan dagiti provincial officials ti Abra ken ti Ilocos Sur tapno marisut ti problema iti boundary.

“Masapul a pardasan a risuten ti problema tapno malapdan ti dakes a pasamak wenno riribuk iti nagbaetan ti Tubo ken San Emilio,” kinuna ni Tudayan.

Problema dagiti lumugar a maseknan iti boundary dispute no sadino ti pagbutosanda tunggal eleksion ken ti pagbayadanda iti buis.

Kabayatanna, impakaammo ni Tudayan a nakaawatda iti surat manipud iti bise gobernador ti Benguet tapno mapagpapatangan ti boundary dispute iti nagbaetan ti Ilocos Sur, partikular ti Sugpon ken Benguet.

Impatalged ni Tudayan a dumar-ayda, kaduana dagiti kabaddungalanna iti provincial board, iti nasao a miting mainaig iti nasao a boundary dispute a maangay inton Abril 28 iti provincial capitol ti Benguet.

Iti kallabes, naipadpadamag iti warnakan a ti ili ti Sugpon ti pakaimulmulaan dagiti marihuana a rinaraut dagiti operatiba a polis ngem limtuad a sakup ti Benguet dagitoy a plantasion.

Daytoy ti kayat ti mayor ti Sugpon a mailinteg agsipud iti dakes nga imahe a paltuaden dagiti damdamag iti ilina.#