Brgy. Palacapac, napili a kadur-asan a barangay iti Candon City

CANDON CITY – Ti Barangay Palacapac ti napili a Kadur-asan a Barangay itoy a tawen kalpasan nga inyalatna ti sangapulo ket uppat a gunggona iti kalkalpas a panagpiesta daytoy a siudad idi Marso 16-23, 2013.

Inyalat ti Barangay Palacapac ti pammadayaw a Kadur-asan a Barangay ti siudad kalpasan a napili a Most Healthy Barangay, Cleanest and Greenest Barangay, Best in Nutrition Program Implementation, Safest and Most Peaceful Barangay, Best in Culture and Arts, Best in Agricultural Productivity, Best Performing Barangay, Outstanding Sangguniang Barangay, Best Innovative Practive, Best Barangay Intensive Gardening, Best in Brgy Tree Park, Best in Gender and Development Program Implementation, Best in Tourism Promotion, ken Best in Organic Farming Program Implementation.

Inyawid ti Barangay Calaoa-an ti maikadua a gunggona gapu iti panangabakna iti innem a kategoria a pakairamanan ti Best Implementation of Solid Waste Management, Most Child-Friendly Barangay, Most Functional BDRRMC, Most Functional Barangay Anti-Drug Abuse Council (BADAC), Best in Youth Development Program, Best in Sports and Physical Development Program.

Maikatlo a gunggona ti Barangay San Jose babaen ti panangabakna iti tallo a kategoria, simmaruno ti Barangay Oaig Daya, Barangay Tamurong 2nd, Barangay Tamurong 1st ken Barangay San Agustin.

Tinawen nga isaysayangkat ti Candon City ti Dur-as Award kas pangbigbigna kadagiti barangay a mangipapaay iti napintas a serbisio ken programada iti lugarda. (Manipud iti report ni Danny Antalan)