Footer

Briefing iti gulayan sa masa, naisayangkat

VIGAN CITY- Adu dagiti klase ti nateng a maap-apit ditoy probinsia ngem no mailako kadagiti sabali a lugar, saanen a mabigbig dagitoy a produkto ti Ilocos Sur.

Daytoy ti maysa kadagiti natratar bayat ti briefing a naangay iti  provincial capitol itay Oktubre 26 nga inatendaran  ni Regional Executive Director ti Department of Agriculture iti Region 1 Atty. Cipriano Santiago, Teofilo Quintal ti Department Of Agriculture Povincial Office ken dagiti municipal agriculturist iti kada ili.

Naidagadag bayat ti briefing ti panangiwayat ti departamento ti agrikultura  iti epektibo a sistema tapno dagiti Ilocos Sur vegetables ket mabigbig  a naggapo iti probinsia kas kadagiti repolio a maap-apit sadiay Sta. Catalina a no mailakon iti Baguio ket agbalinen a Baguio cabbage.

Kangrunaan a panggep ti briefing ti pannakapasayaat ken pannakapapintas ti kalidad dagiti maapit a nateng ditoy probinsia ken kas panangsurot iti programa ni Presidente Gloria Macapagal-Arroyo  a Programang Gulayan Para  sa Masa.

Ditoy a nailawlawag  kadagiti participante ti linaon ti gulayan para sa masa program a no sadino a tunggal eskuela, kasta met kadagiti barbarangay ken ili ket mabalin a mangipatakder iti school vegetable garden.

Maysa ditoyen a wagas  ti pannakapatanor dagiti maimula a nateng a napintas ti kalidadna. Tapno maipatungpal daytoy, masapul a maisuro kadagiti mannalon ti kasayaatan ken kabaruan a wagas ti teknolohia ti panagmulaan kadagiti nateng

Naikkan dagiti municipal agriculturist iti hybrid seeds nga iwarasda kadagiti mannalon a mayat nga agmula.#