Brigada Eskwela, naisayangkat iti Candon City

CANDON CITY –  Uray nagtudo, naisayangkat latta ti Brigada Eskwela kadagiti nadumaduma a pagadalan ditoy siudad kas panagsagana ti Department of Education iti panaglulukat ti klase inton Hunio 3.

Segun ken ni Dr. Edna Leal, Division Superintendent ti DepEd-Candon City, makalawas a maisayangkat ti Brigada Eskwela tapno mangrugi a sigida ti klase iti panaglulukat inton Hunio 3.

Nakipartisipar iti Brigada Eskwela ti Philippine National Police-Candon City, BFP, reservists ti Philippine Army, SPES, ken dagiti nagannak.

Kas panagsagana iti panaglulukat iti klase, dinalusan dagiti partisipante dagiti kuarto ken arubayanda, tinarimaanda dagiti nadadael a tugtugaw, lamisaan ken dadduma pay nga alikamen iti uneg ti pagadalan.

Kinuna ni Dr. Leal a ginundawayan payen dagiti nagannak nga impaenrol dagiti annakda bayat ti Brigada Eskwela tapno mangrugin a dagus ti klase iti panaglulukat inton Hunio 3.#