Brigada Eskwela, naisayangkat

CABUGAO, Ilocos Sur – Naisayangkat ti lima nga aldaw a Brigada Eskwela iti duapulo ken innem a pagadalan ditoy nga ili manipud Mayo 18 agingga iti Mayo 23, 2015.

Iti las-ud ti lima nga aldaw, nagbibinnulig dagiti mangisursuro, nagannak, ken iti pannakikammayyet dagiti opisial dagiti barangay a nangpasayaat kadagiti pasilidad dagiti pagadalan kas iti pannakatarimaan dagiti tugaw, lamisaan ken pannakapinta dagiti blackboard, ken dadduma pay a gannuat tapno saandanton a problema iti masungad a panaglulukat ti klase inton Hunio.

Kas programa ti DedEd, tinawen a maangay ti Brigada Eskwela babaen ti panagtitinnulong dagiti mangisursuro, nagannak, barangay officials ken dadduma pay a maseknan nga stakeholders tapno maisagana dagiti pagadalan iti panaglulukat ti klase iti Hunio.#