British national, naikursong iti abut

SANTA, Ilocos Sur – Gapu iti napasamakna, mabalin a saanen nga agsubli pay daytoy turista nga agpasiar ditoy probinsia.

Nagsagrap ni Brian Henry Waite, 73, British national, naasawaan, ken temporario nga agnaed iti Block 7, Lot 4, Palmer Spring Subdivision, Caloocan City dunor iti makannigid a sakana gapu iti pannakatinnagna iti abut a sumurok kumurang 10 kadapan ti kaunegna iti water reservoir sadiay Barangay Banaoang, ditoy nga ili idi bigat ti Abril 9.

Iti report ti polis ditoy, madama nga agretretrato ni Waite iti tuktok ti water reservoir kadagiti buya iti Abra River ket dina nakita ti manhole iti likudanna a puon ti nakatnaganna.

Nagtitinnulongan dagiti nagresponde a police elements ti Santa, Bantay ken dagiti barangay officials ti pannakaiyaon ni Waite iti nakaikursonganna sa naitaray iti Metro Vigan Cooperative Hospital para iti pannakaagasna.#