BSP nagballaag kontra text scam

DAGUPAN CITY – Imballaag ti Bangko Sentral ng Pilipinas (BSP) ti panagannad ti publiko tapno dida mabiktima kadagiti manglokloko babaen iti text messages.

Kinuna ni Luzviminda Soriano, deputy director ti BSP-Dagupan, modus operandi dagiti scammer ti mangipatulod iti text message iti biktimaenda a pangipakaammuanda a nangabak daytoy iti paripa ti BSP ngem masapul nga idepositona iti bangko ti bayad ti buis sakbay a maalana ti premiona.

Kinuna ni Soriano nga awan ti paripa nga isaysayangkat ti BSP ket no adda maawat a kasta a text message, saan koma a patpatien ti nakaawat.

“Ireportyo iti polis wenno iti National Telecommunications Commission no adda naawatyo a text a mangibagbaga a nangabakkayo iti paripa ti BSP,” kinuna ni Soriano.#